Trenza de ovo de Pascua: receita tradicional da Semana Santa galega

A trenza de ovo de Pascua é un doce tradicional moi típico destas datas. Trátase dun pan doce esponxoso, aromatizado con anís e raiadura de laranxa, cunha textura suave e un acabado crocante grazas ao azucre húmido que se engade por enriba.

Na cociña de O Graneiro de Amelia encántannos as receitas de sempre, feitas con ingredientes naturais e co sabor auténtico da repostaría caseira. Hoxe compartimos contigo unha receita paso a paso para preparar unha deliciosa trenza de Pascua na casa.

Ingredientes para facer trenza de ovo de Pascua

Para o prefermento

• 120 g de fariña de forza
• 90 ml de leite enteiro
• 10 g de lévedo fresco de panadería

Para a masa

• 600 g de fariña de forza
• 10 g de lévedo fresco de panadería
• 200 ml de leite enteiro
• 2 ovos e 1 xema
• 150 g de azucre
• Un chorriño de anís
• Raiadura de laranxa
• 100 g de manteiga
• Un belisco de sal

Para decorar

• 1 ovo batido
• Azucre humedecido con unhas gotas de auga

Como facer trenza de Pascua paso a paso

1. Preparar o prefermento

O día anterior mestura nun recipiente a fariña, o leite e o lévedo fresco. Remexe ben ata obter unha masa homoxénea e deixa repousar toda a noite. Este paso axuda a conseguir unha masa máis aromática e esponxosa.

2. Preparar a masa

Nun bol grande engade a fariña, o azucre, os ovos, o leite, o lévedo fresco, o sal, a raiadura de laranxa, o chorriño de anís e o prefermento preparado previamente. Mestura todos os ingredientes ata que se integren.

3. Amasado

Deixa repousar a masa uns 10 minutos. A continuación amasa durante aproximadamente 12 minutos e deixa descansar outros 10 minutos.

Corta a manteiga en pequenos cubos e incorpóraa pouco a pouco mentres continúas amasando ata que quede completamente integrada.

4. Primeiro levado

Tapa a masa cun pano e déixaa repousar aproximadamente 1 hora, ata que dobre o seu volume.

5. Formar as trenzas

Divide a masa en dúas partes para facer dúas trenzas. Cada parte divídea en dous cordóns de tamaño similar. Une os extremos presionando lixeiramente e forma a trenza.

6. Segundo repouso

Coloca as trenzas na bandexa de forno, píntaas con ovo batido e deixa repousar durante uns 40 minutos.

Pasado ese tempo, volve pincelar con ovo batido e espolvorea o azucre previamente humedecido con unhas gotas de auga.

7. Horneado

Prequenta o forno a 180 ºC.

Enforna durante 35-40 minutos con calor arriba e abaixo ata que as trenzas estean douradas.

Deixa arrefriar lixeiramente… e xa estarán listas para desfrutar.

Consellos para unha trenza de Pascua perfecta

• Emprega fariña de forza de boa calidade para conseguir unha masa máis esponxosa.
• A manteiga debe incorporarse a temperatura ambiente.
• Respectar os tempos de levado é clave para lograr unha trenza suave e aireada.

Unha vez lista, esta trenza de ovo de Pascua caseira é perfecta para compartir en familia, acompañada dun café ou chocolate quente.